Megjithatë, një "kapsulë kohe" dixhitale, Wayback Machine e Archive.org, ka ruajtur një arkiv të madh të këtyre ndërveprimeve. Problemi doli në pah pasi u zbuluan chat-e me të dhëna shumë të ndjeshme, duke ngritur pyetje serioze mbi qëndrueshmërinë e informacionit online.

Funksioni i çaktivizuar nga OpenAI

Pas polemikave dhe reagimeve online, OpenAI çaktivizoi funksionin që mundësonte indeksimin e bisedave, duke fshirë shumicën e tyre nga Google. Dane Stuckey, shefi i sigurisë së informacionit (CISO) në OpenAI, shpjegoi se ky funksion kishte krijuar "mundësinë që përdoruesit të ndanin pa dashje përmbajtje të padëshiruara". Por edhe pse problemi dukej se ishte zgjidhur me fshirjen nga Google, në fakt nuk është zgjidhur plotësisht.

Bisedat ende të dukshme

Një hetim nga newsletter-i Digital Digging zbuloi se mbi 110.000 biseda me ChatGPT janë ende të dukshme dhe të aksesueshme përmes Wayback Machine në Archive.org. Ky arkiv dixhital, i njohur si "kapsula e kohës" së internetit, ruan versione të kaluara të faqeve, edhe pasi përmbajtjet origjinale janë ndryshuar ose hequr. Mark Graham, drejtori i Wayback Machine, konfirmoi se organizata e tij nuk ka marrë kërkesa në shkallë të gjerë nga OpenAI për të përjashtuar këto përmbajtje. Kjo do të thotë se, megjithëse Google nuk mund t'i shfaqë më dhe linket origjinale janë fshirë, kushdo që di linket e Archive.org mund ende të aksesojë këto biseda të plota, "të ngrira në kohë", duke treguar se asgjë nuk zhduket plotësisht nga interneti.

Bisedat: Largimi i indigjenëve për një central elektrik

Mes bisedave të zbuluara dalin edhe skema që tejkalojnë shkëmbimet e thjeshta dhe të pafajshme. Një rast veçanërisht tronditës përfshin një avokat italian që në një bisedë ekspozonte hapur strategjinë e një grupi shumëkombësh të sektorit energjetik për të zhvendosur një komunitet të vogël indigjenësh në Amazonë. Përdoruesi iu prezantua ChatGPT duke deklaruar se ishte "avokat i një grupi shumëkombësh energjetik që synon të zhvendosë një komunitet indigjen për të ndërtuar një digë dhe një central hidroelektrik". Biseda zbulonte plane për një impiant 15,000 MW dhe avokati pyeste qartë ChatGPT-në: "Si mund të arrijmë çmimin më të ulët të mundshëm në negociatat me këta indigjenë?", duke theksuar se indigjenët "nuk e njohin vlerën monetare të tokës dhe nuk kanë ide si funksionon tregu", duke zbuluar kështu qëllimin për të shfrytëzuar diferencën e njohurive për fitim korporativ.

Shembuj të tjerë përfshijnë raste të shumta të mashtrimit akademik, me studentë që përdorin ChatGPT për të shkruar pjesë të tëra tezash ose artikujsh. Disa studentë madje janë mburrur se kanë marrë nota të larta falë ndihmës së inteligjencës artificiale. OpenAI, pavarësisht se është kontaktuar, nuk ka dhënë komente publike për Digital Digging.

Si të mbroheni

Përdoruesit kanë mundësinë të menaxhojnë bisedat e ndara duke hyrë te cilësimet e profilit dhe në seksionin "Kontrolli i të dhënave", ku mund të fshijnë përmbajtjen që nuk dëshirojnë të qëndrojë online. Në rast të indeksimit të bisedës, mund të kërkojnë heqjen nga Google përmes këtij linku.

Ndarja e bisedave përmes një linku

Gjithçka nisi pak ditë më parë, kur mijëra biseda të përdoruesve me ChatGPT u shfaqën në rezultatet e kërkimit të Google. Nuk ishte një shkelje privatësie apo rrjedhje e të dhënave. Përkundrazi, dukshmëria e këtyre bisedave ishte rezultat i një funksioni të veçantë të OpenAI që kërkonte pëlqimin e shprehur të përdoruesve: ata mund të ndanin bisedat me chatbot-in përmes një linku publik, duke zgjedhur një opsion specifik.