Ashtu siç ishte paralajmëruar mbërritën reklamat në Netflix. Plani i ri "Basic with Ads" duke filluar nga sot është i disponueshëm për 7 dollarë në muaj. Aktualisht ky plan i ri është i disponueshëm në 12 vende, duke përfshirë SHBA, Mbretërinë e Bashkuar, Australi, Brazil, Kanada, Francë, Gjermani, Itali, Japoni, Meksikë, Korenë e Jugut dhe Spanjë.
Reklamat fillimisht do të jenë nga 15 - 30 sekonda dhe do të jepen para dhe gjatë shfaqjeve. “Basic with Ads” do t’u japë abonentëve një gamë të gjerë programesh të Netflix, por jo të gjithë katalogun e platformës. Reklamat bazohen në disa kritere sipas vendit ku jetoni, si dhe zhanret e përmbajtjes që shikoni. Nielsen po ndjek gjithashtu performancën e këtyre reklamave në SHBA përmes sistemit të saj të vlerësimit dixhital.
Netflix shpreson se plani i ri do ta bëjë shërbimin e tij të aksesueshëm për një audiencë më të gjerë se më parë. Netflix ka humbur abonentë në tremujorët e fundit dhe “Basic with Ads” mund të ndihmojë ose në tërheqjen e të ardhurve ose t'i mbajë përdoruesit ekzistues që të mos largohen. Ndër të tjera, abonentët e “Basic with Ads” nuk do të mund të shkarkojnë përmbajtje në pajisjet e tyre dhe cilësia e videove është e kufizuar në 720p / HD. Me këtë abonim me çmim të ulët, ju do të mund të shikoni Netflix vetëm në një pajisje.